पुरस्कार वितरण

यो विद्यालय २०४० सालमा स्थानीय जनसमुदायको पहलमा सामान्य पाटी पौवाबाट स्थापना भई हाल पूर्व प्राथमिक कक्षा देखि १२ कक्षा सम्म सञ्चालित विद्यालय हो । काठमाडौ जिल्लामा रहेर पनि अत्यन्त पछाडि परेको तामाङ समुदायको बसोबास बाहुल्य रहेको यस विद्यालयमा हाल झण्डै ७०० जना विद्यार्थी अध्ययनरत रहेका छन् । ९ कक्षा देखि १२ कक्षासम्म प्राविधिक विषय अन्तर्गत कम्प्युटर इन्जिनियरिङ विषयमा समेत अध्ययन अध्यापनको सुविधा रहेको छ । विद्यालयले हालसम्म १५०० जना विद्यार्थीलाई तत्कालीन एसएलसी र हाल एसईई परीक्षामा सामेल गराई उत्तीर्ण गराएको छ । स्थलगत भ्रमणको आधारमा हेर्दा विद्यालयको गुणस्तरीय पठन पाठनका कारण शहरबाट उक्त विद्यालयमा भर्ना हुन जाने विद्यार्थीहरुको लहर समेत चलेको अवस्था देखिन्छ ।
विद्यार्थीका लागि आवासीय सुविधा सहितको यस विद्यालयमा प्रविधिमैत्री पठन पाठनमा बढी जोड दिईएको छ । अत्यन्त व्यविस्थत र नमूना पुस्तकालय व्यवस्थापन गरी विद्यार्थीहरुलाई पाठ्यपुस्तक अतिरिक्त थप ज्ञान हासिल गर्ने उचित वातावरण सिर्जना गरेको अवस्था छ । राष्ट्रपति शैक्षिक सुधार कार्यक्रम अन्तर्गत नमूना विद्यालयका रुपमा समेत छनोट भएको यस विद्यालयले अपेक्षित रुपमा द्रुतगतिमा विकास गरेको अवस्था छ । यस विद्यालयले पुराएको सेवा र अनुकरणीय कार्यले दिगो विकासका निमित्त सरकारले लिएको लक्ष्य अनुरुप सवैका लागि गुणस्तरीय शिक्षा प्रदानमा उल्लेख्य टेवा पुराएको अवस्था देखिन्छ ।